SEJARAH PEMANSANG JAKU IBAN

1.0  Jaku Pemuka

Beserimbai enggau pemansang dunya, jaku Iban nyau majak ngerembai sereta ngelekai. Jaku Iban udah tumbuh nitihka institusyen ti ngena iya baka institusyen pengarap, pemerintah, pelajar, media enggau ke bukai. Jaku tu sama tikas enggau jaku bansa bukai ngujungka iya Tu ngayanka jaku Iban tu makin dikelala ukai semina raban bansa kitai empu, iya mega dikelala pupu raban bansa ba menua Malaysia. Chemaline (2011) madahka jaku Iban ti dikembuan raban bansa Iban ukai semina dikelala ari jaku tang ulih mandangka identiti bansa Iban empu ngena jalai ngentapka waris daya idup Iban menya. Tu ngangkatka agi bansa kitai Iban ngambika bediri sama tinggi duduk sama baruh enggau bansa bukai.

Abad ke-21 ti bekaul enggau teknologi tu mayuh bendar meri biuh ngagai pemansang jaku Iban. Kereban chelak baka surat khabar, televisyen enggau media bukai mai ubah ngagai jaku kelebih agi ba pengawa nusui berita ti deka dikenataika ngagai bala mayuh. Besenutuk enggau dunya siber diatu mega, mayuh bendar raban nembiak Iban rebak baru berengkah ngena jaku Iban dalam ruang siber enggau internet. Peluang tu dikena raban penganda jaku Iban sereta nembiak Iban ngerembaika penemu sida. Penemu senentang jaku dikungsi nengah e-mel tauka buah runding dibantaika dalam blog. Pekara tu mai penguntung ngagai bala ke bukai ti deka begunaka informasyen senentang jaku enggau daya idup orang Iban.

Ubah pemansang jaku Iban tu tau diperati agi nengah ubah sistem sepil ke baru. Bepun ari pengawa jaku Iban ti dikena ngerembaika pengarap Kristian lebuh jeman Rajah Brooke suba, jaku Iban bisi ngembuan sistem sepil kediri. Taja pia, sistem sepil jaku kelia patut disidi lalu diadu ke baru ngambika entap serta seriran enggau diterima raban komuniti Iban empu. Tu mih perkara ti nyengenda dalam pemansang jaku Iban baka ke diatu. Berindik ari perkara tu mega, mayu bendar penganda jaku Iban ti ngembuan penemu sereta pengelandik enda ngira dalam bidang institusyen tinggi tauka bidang ti besangkut enggau daya idup Iban. Sida iya mega megai tanggung pengawa ngerembai sereta ngemansangka agi jaku tu ngagai tikas ke tinggi.

Nembiak rebak baru patut ngembuan penemu senentang daya idup kitai Iban  kelebih agi ba jaku tu. Sejarah pemansang jaku bansa kitai serta ubah pengidup Iban kemaya hari tu patut dilansa ngambika nembiak kemaya hari tu bisi ngembuan pengangkun ngagai jaku sereta daya idup bansa diri. Tu mega siti ari chara kitai deka ngemansang sereta ngangkatka bansa diri ngambi enda tinggal enggau bansa bukai.

2.0  Sejarah Pemansang Jaku Iban

Jaku Iban endang sigi udah nyadi jaku ti dikena berkomunikasyen raban bansa Iban. Iya nyadika penegap tauka peneguh kaul enggau diri seraban. Chemaline (2011) madahka jaku Iban tu siti ari jaku Autronesia. Lebuh Sultan Brunei megai menua Sarawak dulu kelia, jaku tu sigi udah nyadi jaku lingua-franca laban dikena pupu raban bansa di Sarawak kelimpah ari dikena pemesai Brunei bejalaika perintah. Besenutuk enggau pemansang dunya, jaku Iban tu majak ngelekai sereta ngerembai nitihka jeman.

2.1 Sejarah Pemansang Jaku Iban Jeman Rajah Brooke (1841-1941)

Penatai Rajah Brooke ngagai menua Sarawak meri empas ngagai pengerembai jaku Iban. Iya nyadi jaku vernakular lebuh jeman nya. Berindik ari sistem pelajar sekula maya perintah Brooke, Jaku Iban mula diajar ba sekula. Asil pengarap Kristian ti dibai Rajah Brooke, mayuh sekula ti ditmbuhka raban pengerembai pengarap Kristian baka sekula St. Thomas ti didirika mission Katolik dalam kandang taun 1948, sekula ti ngena jaku Cina di Bau didiri dalam taun 1864, sekula mission ba menua Bidayuh serta sekula St. Paul di Banting ti didirika pengerembai pengarap Anglikan urung taun 1853.

Sekula St. Paul siti ari sekula ti keterubah bisi ngajar Jaku Iban. Bepun ari perkara tu, sekula tu mayuh mujur dalam ngasilka beberapa katekist ti ngerembaika pengarap Kristian dalam jaku Iban. Ketegal pemujur tu mih mayuh bala nembiak ari menua bukai besekula di Banting laban deka meda kereban ti diajar dalam jaku Iban. Taja pia, sepemanjai Brooke megai menua Sarawak, pengawa sekula nadai dikemansangka laban perintah semina ngarapka raban pengerembai Kristian nirika sekula. Pekara tu nadai meri penguntung ngagai raban bansa Iban laban nadai mayuh orang Iban nemu nulis enggau macha ketegal nadai ngembuan pemandai ba sekula.  Nya alai, jaku Iban maya tu semina nyadi jaku ti dikena ngerembaika pengarap Kristian ngagai raban bansa di Sarawak.

2.2 Sejarah Pemansang Jaku Iban Jeman Koloni

Jaku Iban makin napi pemansang maya jeman koloni. Maya jeman tu, jaku Iban beguna bendar dikena ngatur pechara ba court. Iya mega dikena naburka program bagi Iban ba Radio Sarawak Urung taun 1955, jaku Iban disi dipasukka lalu diajar ba sekula sekondari tang semina dikumbai Asian Language aja enggau dipasukka ba peresa ti dikumbai Sarawak Junior Certificate.

Nama jaku Iban keterubah lebuh dipelajar nembiak maya taun 1957 iya nya Sea Dayak lalu ditukar nyadi Iban Language dalam taun 1958. Tajapan jaku Iban tu bisi dipelajar ba sekula, penanggul ti nuntung pelajar jaku Iban maya nya iya nya pengawa ngajar enggau belajar empai bisi meruan ba endur ke bukai. Tu ngujungka nadai rekod tauka dokumen betulis ti meruan pasal pelajar jaku tu. Urung taun 1956 ngagai 1961, nembiak ti ditemu besekula di Banting enda datai 100. Subjek jaku Iban tu semina bisi diajar ba tikas primari 5 ngagai primari 6 aja.

Nangkanka nya, Jaku Iban majak mansang lebuh turai pelajar dalam jaku Iban sekula Sekondari bisi ditulis The Curricular & Syllibuses for Junior Schools dalam taun 1964. Pengerembai jaku Iban dikemendarka Dewan Undangan Negeri Sarawak beberapa bulan sebedau  numbuhka Malaysia tajapan semina dikemendarka ngagai nembiak Iban aja. Asil ari belajarka jaku Iban, nembiak ngembuan pengelandik bekenaka jaku Iban standard enggau jaku Iban formal ba sekula. Sida mega landik ngalihka jaku Melayu enggau jaku Inggeris ngagai jaku Iban laban ngembuan penemu senentang tukuh, struktur enggau jalai jaku Iban. Penemu sereta penau bala pengajar dalam bidang sejarah, penemu tuai, daya idup enggau litericha Iban dikena sida ngelatih nembiak ngaga karang.

Maya tu mega, siti kompeni penyelak ti dikumbai Borneo Literature Bureau (BLB) ditumbuhka dikena nangkup pengawa ngemansangka jaku Iban ba pengawa ngarang enggau nulis. Kompeni tu nyadi palan ti mekuhka tanggung pengawa ngumpul jerita enggau kereban litericha pupu raban bansa di Pulau Borneo. Peluang tu dikena raban bansa kitai Iban nulis jerita, ensera enggau leka main lalu dichelak dalam bup. Taun 1976, BLB napi pengeretung lalu pengawa nyelak bup tejanggal. Sepengudah penusah tu, BLB lalu diganti enggau Dewan Bahasa dan Pustaka ngujungka kereban litericha Iban enda agi dichelak. Tu kebuah laban karya litericha Iban semina tau dichelak enti dikarang ngena jaku Melayu aja.

2.3 Sejarah Pemanansang Jaku Iban Udah Merdeka

Sepengudah Malaysia ditumbuhka, jaku Iban nyadi jaku ti beguna dalam semua bidang enda ngira bidang ekonomi, politik, institusyen tinggi enggau sosial. Iya mega makin ngerembai nyadi jaku dikena berkomunikasyen tiap pupu raban bansa. Dalam pengawa nusui informasyen, jaku Iban bisi dikena naburka berita ba RTM Sarawak, Radio Iban  baka Cats FM, Wai FM, Bintulu FM, Miri FM enggau mayuh agi. 

Nambahka nya, berita Iban ti ditusui dalam Jaku Iban bisi diayanka ba program tibi baka TV I. Pia mega ba kereban chelak, jaku Iban dikena ngenataika penemu pasal jaku Iban enggau daya idup iban. Chunto kereban chelak baka Majalah Pegari, Senawah, Kenyalang, Utusan Borneo (Berita Iban), Majalah Bangka enggau ke bukai. Bisi mega kereban chelak ti ngayanka litericha kitai Iban baka novel, karang, jerpan enggau ke bukai. Dalam dunya pemerindang, mayuh leka lagu ditengkebang raban bansa Iban lalu meri empas ngagai pengerembai jaku Iban. Iya nyadi batang perkara ti dikena neguhka pengerindu raban bansa kitai ngagai jaku Iban.

Dalam institusyen pelajar,mayuh bup dichelak sereta ditengkebang ngambikka meri penemu ngagai nembiak senentang jaku Iban. Jaku Iban ngerembai ba sistem pelajar sekula lalu dipasukka Opis Pelajar ba sekula primari dalam taun 1988. Taun 2008, jaku Iban diajar ba pom 3 ngagai 5 lalu dipasukka dalam peresa PMR enggau SPM. Udahnya, maya taun 2011, iya diajar ba tikas sekula primari iya nya diajar ba taun satu. Malin pelajar baka bup teks, kereban sanding senentang jaku Iban enggau bup serba reti udah bisi diasilka ambikka dijadika malin pelajar di sekula enggau institusyen tinggi. Mayuh mega bala tebangkar jaku Iban ti ngembuan pengelandik dalam jaku tu.

Urung taun 1968 ngagai 1969, jaku Iban bisi diajar nyadi subjek elektif ba Palan Pematih Pengajar Batu Lintang. Taun 2010, subjek jaku Iban tu dibai ngagai UPSI ba peringkat minor. Sepengudahnya, taun 2011, subjek jaku Iban dijadika subjek major ba Palan Pematih Pengajar Kampus Rajang nyentuk ke sehari tu. Maya 5 ngagai 6 September 2014, program mekuhka jaku Iban dipenyadi maya ngelulu pengawa Simposium Bahasa dan Sastera Iban ti dikeluluka Palan Pematih Pengajar Kampus Rajang. Jaku Iban makin angkat sereta sama tikas enggau jaku bukai kemaya hari tu.